ყალბი პირადობის მოწმობების შესაძლო დამზადების ფაქტზე მიმდინარე გამოძიების ფარგლებში პროკურატურაში გამოკითხვა გაგრძელდება. საქართველოს პროკურატურის პრესსამსახურის ინფორმაციით, დღეს საგამოძიებო უწყებაში უნდა გამოცხადდნენ იუსტიციის სამინისტროს სერვისების განვითარების სააგენტოს ის თანამშრომლები, რომლებიც არასამთავრობო ორგანიზაციებმა პრესკონფერენციაზე დაასახელეს და ასევე „საერთაშორისო გამჭვირვალობა – საქართველოს“ ერთი წარმომადგენელი.

გასაღების ან გამოყენების მიზნით ყალბი პირადობის მოწმობების შესაძლო დამზადების ფაქტზე მიმდინარე გამოძიებასთან დაკავშირებით პროკურორმა ამირან გულუაშვილმა განაცხადა, რომ გამოკითხვისას, არასამთავრობო ორგანიზაციების წარმომადგენლებმა ვერ დაასახელეს სად და ვის მიერ იქნა გამართული თათბირი, სადაც, მათი ინფორმაციით, გაიცა შესაძლო უკანონო დავალება. ასევე, პროკურორის ინფორმაციით, ეკა გიგაური, ირმა პავლიაშვილი და მიხეილ ბენიძე ფაქტობრივად იმეორებდნენ მათ მიერ საჯაროდ გავრცელებულ ტექსტს და რაიმე კონკრეტულ დეტალთან დაკავშირებით მათ გამოძიებისათვის მნიშვნელოვანი ინფორმაცია არ მიუწოდებიათ.

გულუაშვილის თქმით, ყველა მათგანს განემარტა, რომ თუ ისინი ვარაუდობენ, რომ ინფორმაციის გამჟღავნებით შესაძლოა, რაიმე საფრთხე დაემუქროს პირს, რომელსაც ისინი თავიანთ წყაროს ასახელებენ, საგამოძიებო უწყება მზად არის, ეს პიროვნება ჩართოს მოწმეთა დაცვის სპეციალურ პროგრამაში და უზრუნველყოფილი იქნება მისი უსაფრთხოება.

„არასამთავრობო ორგანიზაციების აღმასრულებელ დირექტორებს გამოკითხვისას დაესვათ შეკითხვა იმის თაობაზე, რომ გამოძიებისთვის მიეწოდებინათ ინფორმაცია მათ ხელთ არსებული ინფორმაციის უშუალო წყაროს თაობაზე, ანუ დაესახელებინათ კონკრეტული პირი, ვისგანაც ფლობდნენ ინფორმაციას, შესაძლო დანაშაულებრივ ქმედებებთან მიმართებაში. სამივე მათგანმა, მოახდინა რა აპელირება გამოხატვისა და სიტყვის თავისუფლების შესახებ კანონზე, განაცხადეს, რომ ისინი უარს აცხადებენ აღნიშნული პირის მაიდენტიფიცირებელი ინფორმაციის გამჟღავნებაზე და შესაბამისად, გამოძიებას არ მიაწოდეს ინფორმაცია იმის შესახებ, რომელი პირისაგან ფლობენ ინფორმაციას დანაშაულებრივ ფაქტებთან დაკავშირებით. ამასთან ერთად, ყველა მათგანს განემარტა, რომ თუ ისინი ვარაუდობენ, რომ ამ ინფორმაციის გამჟღავნებით შესაძლოა ამ პირს დაემუქროს რაიმე საფრთხე, საგამოძიებო უწყება მზად არის აღნიშნული პირი ჩართოს მოწმეთა დაცვის სპეციალურ პროგრამაში და უზრუნველყოფილი იქნება მისი უსაფრთხოება. არც ერთი მათგანი არ თანამშრომლობს სამართალდამცავ ორგანოებთან და არ აწვდით მათ ინფორმაციას საქმისათვის მნიშვნელობის მქონე გარემოებებთან დაკავშირებით”,- განაცხადა პროკურორმა.

ყალბი პირადობის მოწმობების დამზადების ფაქტზე საქართველოს მთავარ პროკურატურაში მიმდინარე გამოძიების ფარგლებში გუშინ სამი არასამთავრობო ორგანიზაციის აღმასრულებელი დირექტორი ეკა გიგაური, ირმა პავლიავშილი და მიხეილ ბენიძე, ასევე სერვისების განვითარების სააგენტოს წარმომადგენლები სოსო გიორგაძე და ბეჟან ობგაიძე გამოიკითხნენ.

comments
snowflake snowflake snowflake snowflake snowflake snowflake snowflake snowflake snowflake snowflake snowflake snowflake snowflake snowflake snowflake snowflake snowflake snowflake snowflake snowflakeWordpress balloons powered by nksnow