არ აქვს მნიშვნელობა ერთი ერთზე იქნება თუ ჯგუფურად, ძალადობა ძალადობაა და საჯარო პირების შეფასებებს განსაკუთრებული მნიშვნელობა აქვს, – ამის შესახებ ჟურნალისტებს სახალხო დამცველმა, ნინო ლომჯარიამ პრეზიდენტის განცხადების კომენტირებისას უთხრა.

„არ ვიცი ერთი ერთზე იქნება თუ ჯგუფურად, ძალადობა არის ძალადობა და ეს არის კრიმინალი. რა თქმა უნდა, განსაკუთრებული მნიშვნელობა აქვს საჯარო პირების განცხადებებს და შეფასებებს. არ უნდა მოვახდინოთ არც ერთი ერთზე და არც ჯგუფური ძალადობის რომანტიზება. ძალიან მნიშვნელოვანია, რა გზავნილებს გაავრცელებენ მაღალი პოლიტიკური თანამდებობის პირები ამ საკითხთან დაკავშირებით. ვფიქრობ, ეს მესიჯი ასე აღიქმება, რომ თუ ერთი ერთზე იყო დაპირისპირება, ეს უფრო მისაღებია ან ჯდება ქართულ ტრადიციებში. ეს მსოფლმხედველობა არის შესაცვლელი. ჩვენს საზოგადოებაში არის შესაცვლელი წარმოდგენები იმასთან დაკავშირებით, რომ ძალადობა ერთი ერთზე იქნება თუ ჯგუფური, ეს არის კრიმინალი, მიუღებელია და ვაჟკაცობა გამოიხატება არა ძალადობაში ან თუნდაც ფიზიკურ დაპირისპირებაში, არამედ სხვა ღირებულებებში – სამშობლოს სიყვარულში, დაჩაგრულის დაცვაში და ა.შ.“, – განაცხადა ნინო ლომჯარიამ.

19 ივნისს, დაახლოებით 11 საათზე გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები. 4-დღიანი უწყვეტი საძიებო სამუშაოების შედეგად მყვინთავებმა ფეხბურთელ გიორგი შაქარაშვილის ცხედარი წყალში იპოვეს.

28 ივნისს გიორგი შაქარაშვილის საქმეზე ბრალდებულ 17 პირს აღკვეთის სახით პატიმრობა შეეფარდა.

10 ივლისს პროკურატურამ გაავრცელა ინფორმაცია, რომლის თანახმადაც, გიორგი შაქარაშვილის სიკვდილის მიზეზია ასფიქსია წყალში დახრჩობით. ამასთან, ექსპერტიზის დასკვნით გაირკვა, რომ მას გარდაცვალებამდე მკვრივი-ბლაგვი საგნით მიყენებული დაზიანებები აქვს.

comments