დეკემბერი 6, 2022

INFO7

საინფორმაციო სააგენტო

რომელი ყოფილი მაღალჩინოსანი ეხმარებოდა მიხეილ სააკაშვილს საზღვრის გადმოკვეთაში – პროკურატურამ ვინაობა დაასახელა

საქართველოს გენერალურმა პროკურატურამ დაასახელა იმ ყოფილი მაღალჩინოსნის ვინაობა, ვინც, მათი ვერსიით, ექსპრეზიდენტ მიხეილ სააკაშვილს საქართველოს სახელმწიფო საზღვრის უკანონო გადაკვეთაში ეხმარებოდა.

პროკურატურის განცხადებით, ეს არის შინაგან საქმეთა მინისტრის ყოფილი მოადგილე გიორგი ლორთქიფანიძე. უწყებამ გიორგი ლორთქიფანიძის მიმართ სისხლის სამართლებრივი დევნა დაიწყო. 

“მსჯავრდებულ მიხეილ სააკაშვილის მიერ სახელმწიფო საზღვრის უკანონო კვეთის ფაქტზე, შინაგან საქმეთა სამინისტრომ  გამოძიების შედეგად დაადგინა,   რომ გიორგი ლორთქიფანიძისთვის ცნობილი იყო, რომ   მიხეილ სააკაშვილი საქართველოს საზღვრის უკანონოდ გადაკვეთას გეგმავდა  და მისი დახმარების მიზნით  შეიმუშავა  და დაგეგმა – თუ რა დროს, რა საშუალებით, რა მარშრუტით და რა ხერხით უნდა მომხდარიყო მსჯავრდებულ მიხელ სააკაშვილის მიერ  საქართველოს სახელმწიფო საზღვრის უკანონო კვეთა. 

გიორგი ლორთქიფანიძე  ჯერ კიდევ  2021 წლის აპრილში  შეხვდა  ბრალდებულ ელგუჯა ცომაიას და გარკვეული დახმარების  სანაცვლოდ დაიყოლია  იგი, მისი კუთვნილი მისაბმელიანი სატვირთო ავტომანქანით გადაეყვანა  მიხეილ სააკაშვილი საქართველოს სახელმწიფო საზღვარზე.

2021 წლის სექტემბრის შუა რიცხვებში გიორგი ლორთქიფანიძე კვლავ დაუკავშირდა, ამჯერად საქართველოში მყოფ ელგუჯა ცომაიას და მოსთხოვა მას უკრაინაში ჩასვლა.

ე.ც.  20 სექტემბერს მისი კუთვნილი „SCANIA“-ს ფირმის მისაბმელიანი სატვირთო ავტომანქანით  უკრაინაში გაემგზავრა, სადაც ავტომანქანა რძის პროდუქტებით დატვირთა  და  გიორგი ლორთქიფანიძის შემდგომ მითითებას დაელოდა.

26 სექტემბერს ჩერნომორსკის პორტის მიმდებარე ტერიტორიაზე გიორგი ლორთქიფანიძის კუთვნილი ავტომანქანით ძებნილი მიხეილ სააკაშვილი მიიყვანეს  და ბრალდებულ ელგუჯა ცომაიას კუთვნილ სატვირთო ავტომანქანის სალონში არსებულ წინასწარ მოწყობილ სამალავში გადასვეს, რის   შემდგომაც გადაკვეთეს უკრაინის სახელმწიფო საზღვარი და სატვირთო ავტომანქანა ბორანის ტიპის გემზე, სახელწოდებით „VILNIUS“-ი შეიყვანეს.

როგორც საზოგადოებისთვის უკვე ცნობილია,  28 სექტემბერს, ჩერნომორსკის პორტიდან ფოთის ნავსადგურში შემოვიდა აღნიშნული გემი, რომლიდანაც  29 სექტემბერს, ჩამოვიდა  ე.ც.-ს მფლობელობაში არსებული მისაბმელიანი სატრანსპორტო საშუალება რომელიც დატვირთული იყო რძის პროდუქტებით და მისაბმელში იმყოფებოდა მსჯავრდებული სააკაშვილი.

ფოთის პორტის ტერიტორიაზე ე.წ.  გეზთან, მათ ელოდებოდნენ  შ.წ და ზ.წ. მათი მართვის ქვეშ მყოფი „მერსედესის“ მარკის ავტომანქანით რომელშიც  მიხეილ სააკაშვილი და ე.ც. გადასხდნენ. აღნიშნული ავტომანქანით მიხეილ სააკაშვილი და ე.ც. აბაშის რაიონის სოფელ ტყვირში მდებარე ამ უკანასკნელის საცხოვრებელ სახლში ჩავიდნენ.

29 სექტემბერს,   ე.ც. და მიხეილ სააკაშვილი მ „FORD“-ის ფირმის მიკროავტობუსით, აბაშის რაიონის სოფელ ტყვირიდან გაემართნენ ბათუმის მიმართულებით, და იმავე ტრანსპორტით ბათუმიდან აბაშის მიმართულებით დაბრუნდნენ.

იმავე დღეს,მიხეილ სააკაშვილი და ე.ც. გადასხდნენ სოფელ ტყვირის ტერიტორიაზე გაჩერებულ „SCANIA“-ს  ფირმის  მისაბმელიან სატრანსპორტო საშუალებაში და გ.ნ—სთან ერთად ჩამოვიდნენ თბილისში,სადაც მიხეილ სააკაშვილი  ე.ც.-ს საცხოვრებელ ბინაში დაბინავდა.   სამართალდამცველებმა იგი აღნიშნულ ბინაში 1 ოქტომბერს დააკავეს.

გიორგი ლორთქიფანიძეს ბრალდება საქართველოს სისხლის სამართლის კოდექსის 25,344-ე მუხლის პირველი ნაწილით წარედგინება.

სისხლის სამართლის საქმეზე გამოძიება გრძელდება. 

საზოგადოებას შევახსენებთ, რომ გიორგი ლორთქიფანიძე  2011 წლის 26 მაისს, რუსთაველის გამზირზე მომიტინგეების დარბევის საქმეზე სხვა პირებთან ერთად  ბრალდებულია  სამსახურებრივი უფლებამოსილების გადამეტებისთვის  და ამჟამად, თბილისის საქალაქო სასამართლოში საქმის არსებითი განხილვა  მიმდინარეობს,” – ნათქვამია პროკურატურის განცხადებაში.

დატოვეთ კომენტარი